Arrestimi i profesorit italian Michele D’Angelo në Shqipëri është raportuar nga mediat italiane. Ai aktualisht po mbahet në burgun e Fierit pas një aksidenti të ndodhur më 8 gusht në rrugën Levan-Fier. Prof. D’Angelo, 44 vjeç, është profesor biologjie në Universitetin e L’Aquila-s dhe një shkencëtar i njohur ndërkombëtarisht. Pas dy muajsh paraburgim, çështja po konsiderohet nga mediat italiane si potencialisht një çështje ndërkombëtare.
Ngjarja ka nxitur reagime të forta nga politikanët italianë. Deputeti Luciano D’Alfonso ka kërkuar ndërhyrjen e presidentit Bajram Begaj për kthimin e profesorit në Itali. Këtë kërkesë e mbështesin edhe kolegët e tij universitarë.
Ambasada italiane në Tiranë dhe Konsullata e Përgjithshme në Vlorë po e ndjekin rastin me vëmendje. Ministria e Punëve të Jashtme italiane, sipas Ansa, po mban kontakte të vazhdueshme me shtetasit italianë të përfshirë, duke kryer vizita në burg dhe ofruar ndihmën e nevojshme.
Universiteti i L’Aquila-s ka shprehur angazhimin e tij. Rektori i zgjedhur, Fabio Graziosi, deklaroi: “Po bëjmë gjithçka që mundemi për të kërkuar lirimin e profesorit dhe për të ulur presionin psikologjik mbi të përfshirët.”
Michele D’Angelo dhe partnerja e tij u përfshinë në një aksident automobilistik në Shqipëri më 8 gusht 2025. Të nesërmen, ata u ndaluan nga policia dhe profesori u vendos në paraburgim, me akuzën e mosdhënies së ndihmës. Sipas dëshmitarëve pranë profesorit, ai po udhëtonte me 40 km/orë dhe nuk mundi të shmangte një automjet tjetër që lëvizte me shpejtësi. Autoritetet shqiptare kanë ngritur akuza ndaj profesorit italian për shkelje të rregullave të qarkullimit rrugor dhe “braktisje të mjetit”.
