Zhvillimet e fundit kanë ngritur dyshime serioze mbi ekzistencën e një skeme të mirëorganizuar shantazhi, e cila, nëse provohet nga hetimet, mund të shkojë përtej një rasti të izoluar dhe të marrë përmasat e një veprimtarie të strukturuar kriminale.
Sipas informacioneve të bëra publike deri më tani, viktimat dyshohet se nuk përzgjidheshin rastësisht. Ato josheshiin me pretekste të ndryshme, dërgoheshin në ambiente private, ku fotografoheshin ose filmoheshin dhe më pas përballeshin me kërkesa për para, nën kërcënimin e publikimit të materialeve komprometuese.
Nëse këto pretendime konfirmohen nga organet hetimore, atëherë nuk do të bëhet fjalë për një incident të vetëm, por për një mekanizëm të ndërtuar mbi mashtrimin, shantazhin dhe përfitimin financiar. Hetuesit pritet të verifikojnë nëse veprimet janë kryer nga disa persona me role të ndara, me planifikim dhe në mënyrë të përsëritur.
Ekspertët theksojnë se në raste të tilla arma më e fortë nuk është dhuna fizike, por presioni psikologjik. Në një shoqëri ku reputacioni dhe imazhi publik kanë peshë të madhe, shumë persona mund të zgjedhin të paguajnë në heshtje, duke mos iu drejtuar autoriteteve nga frika e ekspozimit.
Për këtë arsye, nëse dyshimet rezultojnë të bazuara, hetimi nuk duhet të kufizohet vetëm te episodi i fundit. Ai duhet të zgjerohet për të identifikuar çdo viktimë të mundshme, për të verifikuar komunikimet, lëvizjet financiare dhe çdo provë tjetër që mund të ndihmojë në zbardhjen e plotë të skemës së dyshuar.
Autoritetet u bëjnë thirrje çdo personi që mund të ketë qenë viktimë e një rasti të ngjashëm të bashkëpunojë me organet e drejtësisë, pasi dëshmitë e tyre mund të jenë vendimtare për zbardhjen e së vërtetës.
Megjithatë, deri në përfundimin e hetimeve dhe një vendimi të formës së prerë nga gjykata, vlen parimi themelor i shtetit të së drejtës: çdo person konsiderohet i pafajshëm derisa fajësia e tij të provohet ligjërisht.