Ndërsa sot u shënua dita e 23-të e protestës masive në Tiranë, grupi organizator ka vendosur të bëjë publike pesë kërkesat që i konsideron të panegociueshme ndaj qeverisë, kryeministrit, opozitës dhe gjithë klasës politike në vend.
Njoftimi u bë nga ish-luftëtari i UÇK-së, Dritan Goxhaj, i cili, në emër të grupit koordinues të protestës, deklaroi se kërkesat janë produkt i diskutimeve, propozimeve dhe qëndrimeve të shprehura nga qytetarët gjatë 22 ditëve të mobilizimit.
Në fjalën e tij, Goxhaj theksoi se protesta mbetet paqësore dhe qytetare, por e vendosur për të kërkuar ndryshime të thella politike dhe institucionale në vend.
Sipas deklaratës së lexuar prej tij, pesë kërkesat kryesore të protestuesve janë:“Përshëndetje bashkëkombas, bashkëqytetarë dhe bashkëprotestues. Për të gjithë ju, sot jam autorizuar nga grupi koordinues i protestës të lexoj një deklaratë në emër të tyre.
Në emër të grupit koordinues të protestës, duke dëgjuar propozimet e sovranit për 22 ditë me radhë, po dalim sot para jush me këtë deklaratë për të sqaruar protestuesit, si gjithë bashkëkombasit tanë, qofshin ata të pranishëm fizikisht apo ata që na mbështesin me zemër dhe me mendje, se kjo protestë mbarëpopullore dhe paqësore kërkon sa më poshtë:
- Dorëheqjen e panegociueshme të kryeministrit dhe qeverisë.
- Krijimin e një qeverie teknike tranzitore, jopartiake, me mandat 12-mujor.
- Ndryshime kushtetuese, ku të gjithë shtetasit shqiptarë të jenë të barabartë para ligjit, si dhe miratimi i saj me referendum popullor, duke përfshirë ndër të tjera ndryshimin e Kodit Zgjedhor, ndryshimin e ligjit për financimin e partive politike dhe organizatave të ndryshme, kufizimin e ushtrimit të detyrës së kryeministrit në jo më shumë se dy mandate të plota ose të pjesshme gjatë gjithë jetës politike të një individi.
- Paralelisht, ne nuk heqim dorë nga kërkesat fillestare: anulimi i ndryshimeve të bëra në ligjin e zonave të mbrojtura, anulimi i ndryshimeve të bëra në ligjin për trashëgiminë kulturore, shfuqizimi i Paktit të Maleve, si dhe shfuqizimi i statusit të kuadrit ligjor për investimet strategjike.
- Një kontratë e re sociale mes qytetarëve dhe shtetit, e cila do të përpilohet pas konsultimit me intelektualë, ekspertë teknikë dhe qytetarë apartiakë të propozuar nga sheshi i protestës.
Këto janë kërkesat tona të qarta, legjitime dhe të panegociueshme, të dala nga zëri i qytetarëve dhe vullneti i sovranit. Ne mbetemi të vendosur në rrugën e protestës paqësore, demokratike dhe qytetare deri në realizimin e tyre. Shqipëria e shqiptarëve, jo e pushtetarëve.”, mbylli fjalën e tij Dritan Goxhaj.