Policia Rrugore e Tiranës ka intensifikuar kontrollet në rrugët e kryeqytetit dhe në akset hyrëse e dalëse, duke vendosur 11 420 masa administrative vetëm gjatë javës së fundit. Kontrollet janë kryer me qëllim parandalimin e aksidenteve, rritjen e sigurisë rrugore dhe menaxhimin e trafikut.
Sipas të dhënave të bëra publike nga Policia Rrugore, gjatë kësaj periudhe 55 shtetas janë arrestuar ose proceduar për shkelje të ndryshme të Kodit Rrugor, ndërsa 71 automjete janë spostuar me mjet ngritës.
Në fokus kanë qenë veçanërisht shkeljet që konsiderohen me rrezik të lartë për jetën e drejtuesve, pasagjerëve dhe përdoruesve të tjerë të rrugës. Policia ka evidentuar 750 raste të tejkalimit të shpejtësisë, ndërsa 36 drejtues janë ndëshkuar për drejtim të automjetit nën efektin e alkoolit.
Një tjetër problem i evidentuar mbetet përdorimi i telefonit gjatë drejtimit të mjetit, për të cilin janë vendosur 309 masa administrative. Po ashtu, 353 drejtues janë ndëshkuar për mosvendosjen e rripit të sigurimit dhe 411 për mosdhënie përparësie këmbësorëve.
Kontrollet kanë evidentuar gjithashtu 707 parakalime të gabuara, 56 raste të mosrregullimit të shpejtësisë dhe manovrave të gabuara në qendrat e banuara, si dhe 1 369 masa për drejtuesit e motomjeteve që nuk kanë përdorur kaskën mbrojtëse ose jelekun fosforeshent.
Në bilancin e shkeljeve janë përfshirë edhe 256 raste të qarkullimit të motomjeteve në korsitë e biçikletave, 127 masa për xhama të zinj të riveshur dhe 98 raste me mangësi në dokumentacion.
Policia Rrugore e Tiranës u ka bërë apel të gjithë drejtuesve të mjeteve që të respektojnë rregullat e qarkullimit dhe të tregojnë kujdes maksimal në rrugë.
Mesazhi i autoriteteve është i qartë: shpejtësia, alkooli, telefoni në timon dhe manovrat e rrezikshme nuk janë thjesht shkelje të Kodit Rrugor, por veprime që mund të kushtojnë jetë.