Kriza demografike në Greqi po merr përmasa gjithnjë e më shqetësuese. Gjatë një diskutimi në televizionin KRITI TV, një profesor grek paraqiti të dhëna që tregojnë se emigracioni ka luajtur një rol vendimtar në ripërtëritjen e popullsisë dhe në frenimin e rënies së lindjeve në vend.
Sipas të dhënave të paraqitura, rreth 11% e lindjeve të sotme në Greqi janë nga nëna të lindura jashtë vendit, ndërsa afërsisht një në çdo tri lindje ka të paktën njërin prind emigrant të brezit të parë ose të dytë.
Situata paraqitet edhe më e rëndë për popullsinë vendase. Lindjet nga prindër grekë të lindur në Greqi vlerësohen në vetëm 40 mijë në vit, një shifër që përbën afërsisht një të tretën e numrit të vdekjeve. Ky raport dëshmon plakjen e shpejtë të popullsisë dhe mungesën e zëvendësimit të brezave.
Në analizë përmendet në mënyrë të veçantë edhe Shqipëria. Në vitin 1996, Prodhimi i Brendshëm Bruto për frymë në Shqipëri ishte 14 herë më i ulët se në Greqi, ndërsa sot vlerësohet afërsisht sa gjysma e tij. Ngushtimi i diferencës ekonomike ka sjellë një ndryshim të ndjeshëm të flukseve migratore, me shumë shqiptarë që largohen nga Greqia ose zgjedhin vende të tjera.
Profesori shprehet se e njëjta prirje vihet re edhe në raport me vende të tjera, të cilat po e zvogëlojnë me shpejtësi hendekun ekonomik me Greqinë. Madje, sipas tij, në disa tregues Greqia tashmë renditet më keq se vende që dikur konsideroheshin shumë më pak të zhvilluara.
Të dhënat përcjellin një mesazh të qartë: emigrantët nuk kanë qenë thjesht forcë pune, por një faktor thelbësor për ekonominë, familjen dhe të ardhmen demografike të Greqisë. Pa kontributin e tyre, tkurrja e popullsisë do të ishte edhe më dramatike.
Albania TV