Një zhvillim i bujshëm raportohet nga mediat lidhur me skandalin e njohur “QatarGate”, që tronditi institucionet europiane dhe solli në qendër të hetimeve disa ish-zyrtarë dhe eurodeputetë.
Sipas informacioneve që qarkullojnë, Prokuroria e Belgjikës ka lëshuar një urdhër-arrest për ish-komisionerin europian dhe deputetin grek Dimitris Avramopoulos, emri i të cilit ishte përmendur edhe më herët në hetimet që lidhen me çështjen “QatarGate”, ku protagoniste kryesore ishte ish-zëvendëspresidentja e Parlamentit Europian, Eva Kaili.
Raportohet se dokumentacioni përkatës pritet t’i përcillet Parlamentit grek, ndërsa procedurat e mëtejshme do të varen nga rregullat që lidhen me imunitetin parlamentar. Burime qeveritare greke citohet të kenë deklaruar se, nëse konstatohet ekzistenca e një vepre penale, do të ndiqen procedurat për heqjen e imunitetit të deputetit.
Nga ana tjetër, bashkëpunëtorë të Dimitris Avramopoulos kanë bërë të ditur se do të jepen përgjigje dhe sqarime të menjëhershme për këtë çështje.
Skandali “QatarGate” konsiderohet një nga çështjet më të mëdha të korrupsionit që kanë prekur institucionet europiane në vitet e fundit, me akuza për ndikim politik dhe përfitime të paligjshme në favor të interesave të huaja.
Zhvillimet e ardhshme pritet të tregojnë nëse ky rast do të hapë një kapitull të ri në hetimet e autoriteteve belge dhe nëse do të ketë pasoja politike në Greqi dhe në nivel europian.