Ministrja për Evropën dhe Punët e Jashtme të Shqipërisë, Elisa Spiropali, mori pjesë në Debatin e Nivelit të Lartë në Këshillin e Sigurimit, ku u diskutua roli i Inteligjencës Artificiale (IA) në paqen dhe sigurinë ndërkombëtare.
Në fjalën e saj, Spiropali theksoi mbështetjen e fortë të Shqipërisë për përpjekjet e Kombeve të Bashkuara drejt krijimit të një kuadri global për përdorimin e sigurt, etik dhe të përgjegjshëm të IA.
Ajo vuri në dukje se IA ofron mundësi të paprecedenta për të mbështetur zhvillimin, qëndrueshmërinë dhe parandalimin e krizave. Spiropali bëri thirrje që shtetet të kapërcejnë hendeqet digjitale, të forcojnë kapacitetet dhe të ndajnë praktikat më të mira, duke siguruar që inovacionet të udhëhiqen nga të drejtat e njeriut, e drejta ndërkombëtare dhe parimet e Kartës së Kombeve të Bashkuara.
Duke folur për përvojën e Shqipërisë, Spiropali theksoi përkushtimin e vendit për të zhvilluar politika dhe institucione vizionare për shfrytëzimin e përgjegjshëm të potencialit të IA. Ajo përmendi emërimin e “Diellës”, një ministre të integruar me Inteligjencë Artificiale nga Kryeministri Edi Rama, duke e bërë Shqipërinë vendin e parë në botë që përfshin një sistem të tillë në nivel qeverisjeje të kabinetit.
Sipas saj, kjo është një hap strategjik për të forcuar transparencën, për të përshpejtuar efikasitetin dhe për të integruar IA në politikat kombëtare, duke u bazuar në parimet e etikës, inovacionit, luftës kundër korrupsionit dhe të drejtave të njeriut.
Ky veprim konkret reflekton bindjen se IA duhet të integrohet në qeverisje në mënyrë që t’u shërbejë qytetarëve, të përmirësojë shërbimet publike dhe të kontribuojë në sigurinë dhe mirëqenien afatgjatë.
Në përmbyllje, Spiropali nënvizoi gatishmërinë e Shqipërisë për të bashkëpunuar ngushtë me shtetet anëtare, Kombet e Bashkuara dhe aktorët përkatës, për të nxitur besimin, gjithëpërfshirjen dhe qëndrueshmërinë në përdorimin e Inteligjencës Artificiale.
