Prokuroria Fier ka nisur procesin gjyqësor ndaj 7 personave të përfshirë në vrasjen e dyfishtë të Gramoz dhe Lavdimir Kurtaj, të cilët u ekzekutuan me armë zjarri në fshatin Kurjan të Roskovecit më 10 shtator 2024, rreth orës 14:00.
Hetimet e zhvilluara nga organi i akuzës kanë nxjerrë në pah se Altin Kukaj (50 vjeç), Ervis Kukaj (22 vjeç) dhe Emauris Kukaj (19 vjeç), babë e dy djem, bashkëpunuan për të kryer vrasjet.
Dinamika e ngjarjes sipas Prokurorisë:
- Pak para krimit, Ervis Kukaj pati një konflikt fizik me djemtë e Gramoz Kurtaj, duke qëlluar me pistoletë kundrejt tyre dhe viktimës.
- Pas një komunikimi telefonik, Ervis dhe Emauris Kukaj u takuan, ku ky i fundit i tregoi ngjarjen vëllait.
- Arma e zjarrit, një automatik luftarak modeli 56, e përdorur nga Altin Kukaj kundrejt viktimave, ishte lënë nga Ervis Kukaj në një kasolle pranë pularisë për t’u marrë më vonë nga Emauris Kukaj.
- Emauris Kukaj, pasi mori armën, shkoi në vendin ku ndodheshin viktimat, frenoi pranë lokalit të tyre, mori armën dhe mbushi karikatorin, duke nxitur babain e tij të qëllonte me breshëri.
- Altin Kukaj qëlloi drejt Gramoz dhe Lavdimir Kurtaj me armën automatike, të cilën ia mori nga dora djalit të tij, Emauris Kukaj.
Të pandehur të tjerë për këtë krim janë:
- Tomor Zyka, i akuzuar për “Përkrahja e autorit të krimit”.
- I pandehuri me iniciale Y.K., i akuzuar për “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi dhe mbajtja pa leje e armëve të gjuetisë dhe sportive”.
- I pandehuri me iniciale R.H., i akuzuar për “Moskallëzimi i krimit”.
- I pandehuri me iniciale E.H., i akuzuar për “Moskallëzimi i krimit”.
Prokuroria pranë Gjykatës së Shkallës së Parë të Juridiksionit të Përgjithshëm Fier ka përfunduar hetimet dhe ka kërkuar dërgimin në gjyq të shtetasve A.K., Er.K. dhe Em.K. për veprën penale “Vrasja në rrethana të tjera cilësuese”, si dhe të katër personave të tjerë për përkrahje të autorit të krimit dhe moskallëzim të krimit.
Prokuroria Fier thekson angazhimin e saj për të vënë para përgjegjësisë penale të gjithë ata që kryejnë vepra penale kundër jetës dhe shëndetit.
