Në Ditën Botërore të Farmacistit, një rol thelbësor në lidhjen mes mjekut dhe pacientit, kërkohet rishikimi i ligjit aktual. Synohet që farmacisti të mos shihet vetëm si shitës barnash, por të ketë mundësinë të ofrojë një gamë më të gjerë shërbimesh. Përveç matjes së tensionit apo glicemisë, ata mund të kryejnë teste apo të ofrojnë këshilla ushqimore, duke shfrytëzuar kurrikulën e tyre akademike.
Prof. Dr. Ledjan Malaj nga Departamenti i Farmacisë, Fakulteti i Mjekësisë, thekson: “Një farmacist është në gjendje të ofrojë terapi të personalizuar. Ai njeh mirë barnat dhe mund të zgjedhë më të cilin bar është më cilësor për pacientin. Ndërsa mjeku fokusohet te patologjia dhe mjekimi, farmacisti mund të kryejë teste ose të mbledhë të dhëna për sëmundshmërinë në nivel kombëtar, pasi është më pranë pacientit dhe më lehtësisht i aksesueshëm.”
Urdhri i Farmacistëve kërkon ndërhyrje të menjëhershme për rivendosjen e kriterit të distancave midis farmacive. Dëfrim Goma, President i Urdhrit të Farmacistëve, deklaron: “Duhet t’i japim fund shitjes së barnave nga persona jo-farmacistë. Duhet të vendoset kriteri i distancës, pasi aktualisht kemi tre farmaci në çdo pallat. Farmacisti duhet të marrë kompensim për shërbimet shtesë që ofron.”
Për të shënuar këtë ditë, Urdhri i Farmacistëve i ka dedikuar aktivitetet të moshuarve, duke dhuruar pajisje si matës tensioni, matës glicemie, oksimetër dhe disa barna OTC në Shtëpinë e të Moshuarve në Tiranë. Gjithashtu, këto pajisje iu ofruan edhe qytetarëve që u afruan pranë dy stendave të vendosura në shesh.
